वार्नर ब्रदर्स र टिकटकसँगै, यो परिवार पुरानो र नयाँ मिडियामा शक्तिशाली शक्ति बन्नेछ

बर्बांकको विशाल फिल्म लटहरू माथि उभिएको वार्नर ब्रदर्सको पानी ट्याङ्की पुरानो हलिउडको प्रतीक हो। दश माइल दक्षिणमा, कल्वर सिटीमा, टिकटकको रङ्गीन ग्लास–फ्रन्टेड कार्यालय त्यस उद्योगको प्रतीक हो जसले यसको स्थान लिन खोजिरहेको छ। मिडियाको ठूलो लडाइँ पेशेवर उत्पादन स्टुडियोहरू, जस्तै वार्नर, र टिकटक जस्ता टेक प्लेटफर्महरू बीच केन्द्रित छ, जसले एल्गोरिदमद्वारा क्रमबद्ध, प्रयोगकर्ता–उत्पादित सामग्री प्रदान गर्छ। अब दुई सम्झौताहरूले यी दुवै कम्पनीहरूलाई एकै परिवारको प्रभावमा ल्याउन सक्छ।

ल्यारी एलिसन, ८१ वर्षीय ओराकलका संस्थापक, एक सफ्टवेयर जायन्ट, उनले आफ्ना छोरा डेभिडलाई अगस्तमा अर्को पुरानो हलिउड स्टुडियो, प्यारामाउन्ट, कब्जा गर्नका लागि अधिकांश नगद उपलब्ध गराए। यो परिवार अब वार्नर ब्रदर्स डिस्कवरी, एक धेरै ठूलो प्रतिस्पर्धी, का लागि टेण्डरको बोली लगाइरहेको भनिएको छ। यसैबीच, ओराकल टिकटकको अमेरिकी सञ्चालनलाई यसको चिनियाँ मालिक बाइटडान्सबाट किन्ने समूहको हिस्साका रुपमा हुनेछ। सेप्टेम्बर २५ मा राष्ट्रपति डोनाल्ड ट्रम्पले सैद्धान्तिक रूपमा बिक्रीलाई स्वीकृति दिएका छन् ।

चार्टः १: अमेरिकी किशोरहरूले सामाजिक मिडिया एपहरूमा बिताउने समय

चार्टः  २: प्रमुख हलिउड स्टुडियोहरूको बक्स-अफिस उत्पादन

यदि यी सम्झौताहरू अगाडि बढे भने, एलिसनहरूलाई अमेरिकाका केही ठूला समाचार र मनोरञ्जन ब्रान्डहरू— ‘गेम अफ थ्रोन्स’ र ‘फ्रेन्ड्स’ देखि सीबीएस न्यूज र सीएनएन— र सामाजिक मिडिया एपमा प्रभाव पार्ने अवसर प्राप्त हुनेछ, जसमा अमेरिकी किशोर–किशोरीहरूले अन्य कुनै पनि भन्दा बढी समय बिताउँछन् (चार्ट १ हेर्नुहोस्)। पुरानो र नयाँ मिडियाबीचको प्रतिस्पर्धा तीव्र हुँदै जाँदा, एलिसनहरू यी दुईक्षेत्रलाई एकसाथ ल्याउनेमा अद्वितीय स्थानमा हुन सक्छन्।

पुरानो मिडियाबाट सुरु गरौं। डेभिड एलिसन, ४२ वर्षीय स्काईडान्स मिडियाका मालिक, जो उनले १५ वर्षअघि आफ्ना बुबाको सहयोगमा स्थापना गरेका थिए, उनले यो गर्मीमा प्यारामाउन्टको नियन्त्रण लिएका छन्। यो फेडरल कम्युनिकेसन्स कमिसन (एफसीसी) सँग लामो समयसम्मको विवाद पछि सम्भव भएको थियो, जसले सीबीएस न्यूजको रिपोर्टबारे ट्रम्पको अत्यन्त संदिग्ध कानुनी गुनासो नसुल्झाएसम्म आफ्नो सहमति रोकेका थियो। ८.४ बिलियन डलरको यो सम्झौता मुख्य रूपमा ल्यारी एलिसनले वित्तपोषण गरेका थिए, जो कृत्रिम बुद्धिमत्ता (एआई) को गोल्डेन दौडले ओराकलको सेयर मूल्य दोब्बर भएपछि विश्वको दोस्रो धनी व्यक्ति बनेका छन्। उनले वार्नर ब्रदर्सको बोलीमा पनि आफ्नो सम्पत्तिबाट रकम प्रयोग गर्न सक्छन्, जसको बजार मूल्य करिब ५० बिलियन डलर छ।

संयुक्त रूपमा, प्यारामाउन्ट र वार्नर एक हलिउड जायन्ट हुनेछ। तिनीहरूको हालको बक्स–अफिस उत्पादन अन्य कुनै स्टुडियोको भन्दा बढी छ (चार्ट २ हेर्नुहोस्)। यी दुईले राष्ट्रिय टेलिभिजन विज्ञापन बजारको सबैभन्दा ठूलो हिस्सा लिनेछन्ः म्याडिसन एन्ड वाल, एक परामर्शदाता कम्पनी, का अनुसार ३५प्रतिशत डिज्नीको २७प्रतिशत को तुलनामा। तिनीहरूका स्ट्रिमिङ सेवाहरू, प्यारामाउन्टं र एचबीओ म्याक्स, ले अमेरिकामा नेटफ्लिक्सभन्दा पनि बढी सदस्यता बेच्छन्।

वार्नर आफैंमा नेटफ्लिक्स जस्ता कम्पनीहरूलाई चुनौती दिने स्केलको अभावमा अधिग्रहण हुन उत्सुक देखिन्छ। तर सम्भावित खरिदकर्ताहरू कम छन्। एप्पल र अमेजन जस्ता टेक कम्पनीहरूले यसको केबल–टीभी सम्पत्तिहरू चाहने सम्भावना कम छ। कमकास्ट नामक एक केबल जायन्ट जो एनबीसी युनिभर्सलको मालिक हो, ट्रम्पसँगको पुरानो रिसका कारण उनको एमएसएनबीसी समाचार सेवाप्रति विरोधको सामना गर्न सक्छ। एलिसनहरूले एन्टिट्रस्ट जाँचको सामना गर्नुपर्ने हुन सक्छ, किनकि मर्जरले पुराना फिल्म स्टुडियोहरूको संख्या पाँचबाट चारमा झार्नेछ। राष्ट्रपतिसँगको तिनीहरूको मैत्रीपूर्ण सम्बन्धले त्यसलाई मद्दत गर्न सक्छ, साथै ट्रम्पको पहिलो कार्यकालमा एन्टिट्रस्ट प्रवर्तक रहेका मकन डेलराहिमलाई प्यारामाउन्टको प्रमुख कानुनी अधिकृतको रूपमा नियुक्त गर्नुले पनि। एफसीसी, जसले कडा रवैया अपनाएको छ, संलग्न हुने छैन, किनकि वार्नरसँग कुनै प्रसारण–टीभी स्वामित्व छैन।

टिकटक सम्झौता अझै टुङ्गिएको देखिँदैन। तर ट्रम्पले ओराकललाई खरिदकर्ताहरूमध्ये ूधेरै ठूलो भूमिकाू खेल्न सक्ने भनेका छन्। ओराकल पहिले नै टिकटकसँग नजिकबाट जोडिएको छ, प्रोजेक्ट टेक्सास भनिने योजनाअन्तर्गत यसका अमेरिकी प्रयोगकर्ताहरूको डेटा भण्डारण गर्दै, जुन चिनियाँ डेभलपरहरूलाई टाढा राख्न डिजाइन गरिएको थियो। बाइटडान्सले कथित रूपमा आफ्नो एल्गोरिदमको एक प्रति टिकटकको नयाँ मालिकहरूलाई भाडामा दिनेछ, जसले ओराकलको निगरानीमा अमेरिकी प्रयोगकर्ताहरूको डेटामा यसलाई पुनः प्रशिक्षित गर्नेछ। पक्षहरूले आगामी जनवरीसम्म विवरणहरूलाई अन्तिम रूप दिनुपर्नेछ। चिनियाँ सरकारले ट्रम्पले भनेझैं सम्झौता भएको कुरामा स्पष्टता दिएको छैन।

एलिसनहरूले आफ्नो नयाँ मिडिया साम्राज्यसँग के गर्नेछन्ः डेभिड एलिसनले प्यारामाउन्ट सम्झौता पछि भनेका थिए कि उनले ूहलिउडको रचनात्मक हृदयलाई सिलिकन भ्यालीको नवीन भावनासँग मिश्रण गर्नू चाहन्छन्। विश्वको सबैभन्दा मूल्यवान सामग्री पुस्तकालयलाई यसको सबैभन्दा तीक्ष्ण सामग्री–सिफारिस एल्गोरिदमसँग संयोजन गर्नु स्पष्ट सम्भावना छ।

एलिसनहरूले पहिले नै ओराकलको प्रविधिलाई प्यारामाउन्टमा कसरी इन्जेक्ट गर्ने भनेर जाँचिरहेका छन्। साफ्रा क्याट्ज, अघिल्लो महिनासम्म ओराकलकी प्रमुख कार्यकारी, प्यारामाउन्टको बोर्डमा रहनेछिन् । डेभिड एलिसनले स्टुडियोको सञ्चालनलाई एकल टेक स्ट्याकमा ल्याउने बताएका छन्ः यो वर्ष प्यारामाउन्टले ओराकलसँग क्लाउड–कम्प्युटिङ सम्झौताको लागि वार्ता गरिरहेको भनिएको थियो। बर्न्स्टिनले औंल्याए अनुसार, ओराकलले पहिले नै आफ्नो सर्नर, एक स्वास्थ्य–टेक कम्पनीको अधिग्रहणबाट प्राप्त डेटा प्रयोग गरेर विभिन्न स्वास्थ्य–हेरचाह एपहरू बनाउँछ। टिकटकसँग, यसले युवा अमेरिकीहरूले के हेर्न मन पराउँछन् भन्ने डेटाको उत्कृष्ट स्रोतमा पहुँच प्राप्त गर्नेछ।

सीबीएस र सीएनएन जस्ता समाचार ब्रान्डहरू र टिकटक, जहाँ धेरै अमेरिकीहरूले आफ्नो समाचार प्राप्त गर्छन्, मा नियन्त्रणले एलिसनहरूलाई उल्लेखनीय राजनीतिक शक्ति दिनेछ। ल्यारी एलिसन ट्रम्पसँग राम्रो सम्बन्धमा छन् र रिपब्लिकन उम्मेदवारहरूलाई चन्दा दिएका छन्। तर उनले पहिले आफूलाई मध्यमार्गी भनेका थिए, १९९० मा बिल क्लिन्टनलाई समर्थन गरेका थिए र बेलायतका पूर्व प्रधानमन्त्री सर टोनी ब्लेयरसँग नजिक रहेका छन्। उनी इजरायलका प्रधानमन्त्री बिन्यामिन नेतन्याहूसँग पनि मैत्रीपूर्ण सम्वन्धमा छन्। प्यारामाउन्ट एकमात्र प्रमुख स्टुडियो थियो जसले हालै हलिउड स्टारहरूले इजरायलको बहिष्कारको लागि आह्वान गर्ने पत्रको आलोचना गर्यो।

डेभिड एलिसनले आफ्नो तर्फबाट सीबीएस न्यूजको कभरेजको निगरानी गर्न एक रूढिवादी–झुकाव भएको ‘ओम्बुड्सम्यान’ नियुक्त गरेका छन्। ट्रम्पले दाबी गरे अनुसार उनले प्यारामाउन्टबाट २० मिलियन डलरको विज्ञापन र सार्वजनिक–सेवा घोषणाहरू प्राप्त गर्ने अपेक्षा गरेका छन्। तर युवा एलिसनले २०२४ मा जो बाइडेनको राष्ट्रपति अभियानमा करिब १ मिलियन डलर चन्दा दिएका थिए, र हालै प्यारामाउन्टको कार्टुन ‘साउथ पार्क’. लाई १.५ बिलियन डलरमा नवीकरण गरेका छन्, यसले ट्रम्पको लिङ्गको आकारलाई निरन्तर मजाक गर्ने गर्छ। अगस्तमा सीबीएस न्यूज र राष्ट्रपतिबीचको विवादबारे सोध्दा, प्यारामाउन्टका नयाँ मालिकले भनेका थिए ‘हामी कम्पनीलाई राजनीतिकरण गर्ने उद्धेश्य राख्दैनौं।’ यो उनले अपेक्षा गरेभन्दा गाह्रो हुन सक्छ।

द इकोनोमिष्टबाट