काठमाडौं । नेकपा माओवादी केन्द्रले कर्णाली प्रदेशबाट प्रतिनिधिसभा र प्रदेशसभा सदस्यमा चुनाव लड्ने उम्मेदवारको टुंगो लगाएको छ।

सत्ता गठबन्धनमा भएको भागबन्डामा माओवादीले कर्णाली प्रदेशका १२ प्रतिनिधिसभा निर्वाचन क्षेत्रमध्ये पाँच सिट पाएको छ। प्रदेशसभाका २४ सिटमध्ये माओवादीको भागमा ९ सिट परेको छ।

प्रतिनिधिसभातर्फ रुकुम पश्चिममा जनार्दन शर्मा, जाजरकोटमा शक्तिबहादुर बस्नेत, कालिकोटमा महेन्द्रबहादुर शाही, जुम्लामा गोमा कुँवर र हुम्लामा छिरिङ डम्डोल लामा कार्चेनलाई उम्मेदवार बनाउने निर्णय भएको माओवादी कर्णाली प्रदेश अध्यक्ष विमला केसीले जानकारी दिइन्।

प्रदेशसभातर्फ रुकुम पश्मिमको क मा महेन्द्र केसी र ख मा राजकुमार शर्मा उम्मेदवार बन्नेछन्। क मा भने कांग्रेसले पनि दाबी गरेको छ। यसबारे दुवै दलका नेताहरुबीच छलफलमा पनि चलिरहेको छ।

सुर्खेत–१ ख मा कृष्णबहादुर जीसी (जितेन्द्र) र २ को ख मा बिन्दमान विष्ट उम्मेदवार बन्नेछन्। दैलेख–२, ख मा उपेन्द्रकुमार रावत ‘सुशील’ उम्मेदवार बन्नेछन्।

कालिकोटको क मा दुर्गा रावत, डोल्पा ख मा वीरबहादुर शाही, हुम्ला क मा रणसिंह परियार, सल्यान क मा भीमप्रकाश शर्मा र मुगुमा ख मा मंगल शाहीलाई माओवादीले उम्मेदवार बनाएको छ ।