इस्तानबुल, ३ असार । साउदी क्राउन प्रिन्स मोहम्मद बिन सलमानले जुन २२ मा टर्की भ्रमण गर्ने कार्यक्रम तय भएको टर्कीका अधिकारीले शुक्रवार एएफपीलाई बताएका छन् ।

इस्तानबुलको साउदी वाणिज्य दूतावासभित्र पत्रकार खशोग्गीको क्रूर हत्यापछि राजकुमार मोहम्मदको यो पहिलो टर्की भ्रमण हो ।

पत्रकार हत्या प्रकरणले विश्वलाई स्तब्ध बनाएको थियो र क्षेत्रीय प्रतिद्वन्द्वीहरू बीचको सम्बन्धमा ठूलो चोट पुर्याएको थियो । पत्रकार जमाल खशोग्गीको हत्या सन् २०१८ मा भएको थियो । टर्कीका राष्ट्रपति रेसेप तैयप एर्दोगानले अप्रिलको अन्त्यमा साउदी अरबको भ्रमण गरेका थिए । उनी मक्का यात्रा गर्नु अघि राजकुमारलाई भेट गरेका हुन् ।

उक्त समयमा यी दुई नेताबीच साउदी–टर्की सम्बन्ध र तिनीहरूलाई सबै क्षेत्रमा विकास गर्ने तरिकाहरूको समीक्षा भएको साउदी राज्य समाचार एजेन्सीले जानकारी दिएको थियो । खाडी राज्यमा रियादको नेतृत्वमा गरिएको नाकाबन्दीमा कतारलाई सहयोग गरेको कारण टर्कीले साउदी अरेबियासँगको सम्बन्ध पहिले नै तनावपूर्ण बनाएको थियो । खशोग्गीको हत्यापछि तीन वर्षसम्म सम्बन्ध चिसिएको थियो ।

साउदी अरेबियाले टर्कीको अर्थतन्त्रमा दबाब दिँदै टर्कीको आयातको अनौपचारिक बहिष्कारको साथ प्रतिक्रिया दियो । अब उच्च मुद्रास्फीति र राष्ट्रपति चुनावको एक वर्षअघि जीवनको लागत सङ्कटको साथ, एर्डोगानले खाडी देशहरूबाट समर्थन खोज्दै छन् ।