काठमाडौं । प्रधानमन्त्री केपी शर्मा ओलीविरुद्ध सर्वाेच्च अदालत प्रशासनमा वरिष्ठ अधिवक्ता कुमार शर्मा आचार्य र अधिवक्ता कञ्चनकृष्ण न्यौपानेले अवहेलनाको दुईवटा मुद्दा दर्ता गराएका छन् । आचार्यको ५२२१ नम्बरमा र न्यौपानेको ५२२६ नम्बरमा दर्ता भएको छ ।

प्रधानमन्त्री ओलीले माघ ९ गते काठमाडौंको कार्की ब्याङ्केटमा भएको कार्यक्रममा वरिष्ठ अधिवक्ता कृष्णप्रसाद भण्डारी बारे ‘एक जना बाजे वकिललाई सर्वाेच्च लगेर तमासा देखाएछन्’ भन्ने टिप्पणी गरेका थिए । बरिष्ठ अधिवक्ता भण्डारीले संसद विघटनविरुद्ध सर्वाेच्च अदालतमा बहस गरेको विषयमा निन्दायुक्त टिप्पणी गरेको अधिवक्ताद्वय आचार्य र न्यौपानेको जिकिर छ ।

वरिष्ठ अधिवक्ता आचार्यले प्रतिनिधिसभा विघटनको मुद्दामा सर्वाेच्च अदालतमा भइरहेको बहसलाई ‘तमासा’ र बहस गर्ने कानुन व्यवसायीलाई ‘बाजे’ भन्ने निन्दायुक्त शब्द प्रयोग गरेर प्रधानमन्त्रीले अदालतको अवहेलना गरेको भन्दै ओलीमाथि न्याय परिषद् ऐन २०७३ को दफा १७ अनुसार हदैसम्मको सजाय माग गरेका छन् ।