काठमाडौं, ३ भदौ । धरानमा ७१ वर्षीया कोरोना संक्रमित वृद्धाको मृत्यु भएको छ । कोरोना भाइरसका कारण सुनसरीमा ७१ वर्षीया महिलाको बुधबार मृत्यु भएको हो ।

धरानस्थित वीपी कोइराला स्वास्थ्य विज्ञान प्रतिष्ठानमा उपचारको क्रममा बिहान ११ बजेर १५ मिनेटमा मृत्यु भएको हो । प्रतिष्ठानका प्रवक्ता डा. निदेश सापकोटाका अनुसार धरानकी स्थायी बासिन्दा उनी साउन २४ गते बिहान अस्पताल भर्ना भएकी थिइन् ।

अस्पतालले जनाए अनुसार उनको दम र मुटुको समस्याका कारण उपचाररत रहेको थियो । खोकी लाग्ने, सास फेर्न गाह्रो हुने र ज्वरोको समस्या देखिएपछि उनी अस्पतालमा भर्ना भएकी थिईन् । त्यसअघि नै साउन २३ गते उनको कोरोना रिपोर्ट पोजेटिभ आएको थियो ।