काठमाडौँ, १५ पुस । नेपाल कम्युनिस्ट पार्टीका संयोजक पुष्पकमल दाहाल प्रचण्ड ले तमु समुदायको महान् पर्व तमु ल्होसार र दुरा समुदायको म्हैप्रु नकुमा पर्वका अवसरमा स्वदेश तथा विदेशमा रहेका सम्पूर्ण नेपालीहरूमा सुख, शान्ति र समृद्धिको शुभकामना व्यक्त गरेका छन्।

मंगलबार शुभकामना सन्देश जारी गर्दै उनले यी पर्वहरूले नेपालको बहुसांस्कृतिक पहिचानलाई विश्वसामु जीवन्त राख्न मद्दत पुर्‍याएको उल्लेख गरे।हाम्रा मौलिक संस्कार र संस्कृतिहरू नेपाली पहिचानका बलिया स्तम्भ भएको बताउँदै यिनै विविधताले समाजलाई एकताबद्ध बनाएको प्रचण्डले उल्लेख गरेका छन्। आपसी सद्भाव र सहअस्तित्वलाई नेपाली सांस्कृतिक जीवनको सुन्दर आधार मान्दै उनले परिवर्तनका हरेक आन्दोलनमा यी बहुल समुदायको भूमिका महत्त्वपूर्ण रहेको स्मरण गरे।शुभकामना सन्देशमा उनले बहुजाति, बहुभाषा र बहुसंस्कृतिको संगमस्थल रहेको नेपालमा सबै समुदायको सहअस्तित्व, समानता र समावेशितालाई जोड दिएका छन्। राज्य नीतिको प्रभावकारी कार्यान्वयनबाट मात्र राष्ट्रिय एकता सुदृढ हुने विश्वास व्यक्त गर्दै उनले गणतन्त्रको छहारीमा यस्ता संस्कृतिहरूको संरक्षण र प्रवर्द्धन गर्नु आजको प्रमुख आवश्यकता रहेको बताए।अन्त्यमा, उनले ल्होसार र म्हैप्रु नकुमा पर्वलाई हर्षोल्लासका साथ मनाउन आग्रह गर्दै यी पर्वहरूले नेपालीहरूबिचको पारस्परिक सद्भाव र सहिष्णुतालाई अझ मजबुत बनाउने कामना समेत गरेका छन्।