कार्डियोभास्कुलर स्वास्थ्यमा सुधारको विश्लेषणपछि अनुसन्धानकर्ताहरूले ‘लिंग–विशेष रणनीति’ अपनाउन सुझाव दिएका छन्।

अनुसन्धानकर्ताहरूका अनुसार, पुरुषहरूलाई कोरोनरी मुटु रोगको जोखिममा समान कमी ल्याउनका लागि महिलाको तुलनामा दोब्बर बढी व्यायाम आवश्यक पर्न सक्छ। उनीहरूले स्वस्थ जीवनशैली सम्बन्धी दिशानिर्देशहरूले लिंगका आधारमा हुने यस भिन्नतालाई ध्यान दिनुपर्ने बताएका छन्।

वैज्ञानिकहरूले ८०,००० भन्दा बढी मानिसहरूको शारीरिक गतिविधि रेकर्डहरूको विश्लेषण गरेका छन् । अध्ययनमा पाइएअनुसार, प्रति हप्ता २५० मिनेट व्यायाम गर्ने महिलाहरूमा मुटु रोगको जोखिम ३० प्रतिशत ले घट्यो। यसको विपरीत, पुरुषहरूलाई समान प्रभाव प्राप्त गर्न प्रति हप्ता ५३० मिनेट, वा झन्डै नौ घण्टा, व्यायाम आवश्यक पर्‍यो।

यो अध्ययनले अघिल्ला कामहरूलाई पुष्टि गर्दछ, जसले सुझाव दिए अनुसार महिलाहरूले समान मात्राको व्यायामबाट पुरुषको तुलनामा बढी फाइदा लिन्छन्। यद्यपि, महिलाहरू सामान्यतया पुरुषभन्दा कम शारीरिक रूपमा सक्रिय हुन्छन् र सिफारिस गरिएका व्यायाम लक्ष्यहरू पूरा गर्ने सम्भावना कम हुन्छ।

एनएचएस दिशानिर्देशहरू अनुसार, १६ देखि ६४ वर्ष उमेर समूहका पुरुष र महिलाले प्रति हप्ता कम्तीमा १५० मिनेट मध्यम स्तरको व्यायाम, वा ७५ मिनेट कडा व्यायाम, गर्नुपर्छ र साथमा हप्तामा कम्तीमा दुई पटक मांसपेशी बलियो बनाउने गतिविधिहरू गर्नुपर्छ।

तर, यो पछिल्लो कामले पुरुष र महिलाका लागि विशेष सल्लाह को आवश्यकतामा जोड दिन्छ, र मध्यम मात्रामा व्यायाम गर्दा पनि महिलाहरूले प्राप्त गर्न सक्ने ठूलो स्वास्थ्य लाभलाई देखाएको छ । विश्वव्यापी रूपमा, हरेक तीन महिलामध्ये एकको मृत्यु कार्डियोभास्कुलर रोगका कारण हुन्छ।

चिनियाँ जियामिन विश्वविद्यालयका डा. जियाजिन चेन र उनका सहकर्मीहरूले नेचर कार्डियोभास्कुलर रिसर्च नामक जर्नलमा लेख्दै भन्छन्,’पुरुषहरूको तुलनामा, महिलाहरूले आधा मात्रै व्यायाम समय मा पनि समान स्वास्थ्य लाभहरू प्राप्त गर्छन्।’ उनीहरू थप्छन्, ूयस खोजले महिलाहरूलाई शारीरिक गतिविधिमा संलग्न हुन प्रोत्साहित गर्ने सम्भावना छ।ू

डा. चेन र उनका सहकर्मीहरूले युके बायोबैंक परियोजनामा ​​नामांकन गरिएका मध्य–उमेरका स्वयंसेवकहरूले लगाएका गतिविधि ट्र्याकरहरूको तथ्याङ्क विश्लेषण गरेका थिए ।

समान्य जनसंख्यामाः अध्ययनमा मुटु रोग नभएका ८०,२४३ सहभागीहरूलाई हेर्दा, प्रति हप्ता १५० मिनेट व्यायामको लक्ष्य पूरा गर्ने महिलाहरूमा मुटु रोग विकसित हुने जोखिम आठ वर्षको फलो–अप अवधिमा ती लक्ष्य पूरा नगर्नेहरूको तुलनामा २२प्रतिशशत कम थियो। पुरुषहरूका लागि यो जोखिम १७ प्रतिशत कम थियो।
समान लाभका लागि आवश्यक समयः थप विश्लेषणले देखाएअनुसार महिलाहरूले प्रति हप्ता २५० मिनेट व्यायाम गरेर आफ्नो मुटु रोगको जोखिम ३० प्रतिशत ले घटाउन सक्थे, जुन लाभ पुरुषहरूले प्रति हप्ता ५३० मिनेट शारीरिक गतिविधि गरेपछि मात्र प्राप्त गर्न सकेका थिए ।

मुटु रोग भइसकेकाहरूमाः सबैभन्दा महत्त्वपूर्ण नतिजा ५,००० भन्दा बढी मुटु रोग भएका पुरुष र महिलाहरूको तथ्याङ्कबाट आएको थियो । यस समूहमा, प्रति हप्ताको व्यायाम लक्ष्य पूरा गर्ने महिलाहरूमा सोही अनुपातमा सक्रिय पुरुषहरूको तुलनामा फलो-अप अवधिमा मृत्यु हुने जोखिम तीन गुणा कम पाइएको थियो।

पत्रिकाका एक वरिष्ठ लेखक प्रोफेसर यान वाङ ले यो कामले ‘दुवै लिंगले शारीरिक गतिविधिबाट ‘पर्याप्त कार्डियोभास्कुलर लाभू प्राप्त गर्न सक्ने देखाएको र सबैलाई, लिङ्गको परवाह नगरी, नियमित व्यायाम गर्न सिफारिस गरेका छन् ।

म्यासाचुसेट्स जनरल अस्पतालकी महिला कार्डियोभास्कुलर स्वास्थ्य विशेषज्ञ डा. एमिली लाउ ले एक सहयोगी लेखमा लेखेकी छन्ः ‘यो अध्ययनले सबैलाई एउटै उपायु उपयुक्त हुँदैन भन्ने थप प्रमाण दिन्छ र हामीलाई कुराबाट कामतर्फ अघि बढ्न चुनौती दिन्छ। अब समय आएको छ कि दिशानिर्देशहरूमा लिंग विशेष रणनीतिहरू समावेश गरियोस् र महिलाहरूको कार्डियोभास्कुलर स्वास्थ्यलाई अनुकूलित गर्न विशेष हस्तक्षेपहरू विकसित गरियोस्।’
द गार्डियनबाट