काठमाडौं, १२ मंसिर। १० वर्षअघि एमाले छाडेर वैकल्पिक पहिचानवादी पार्टी निर्माणमा लागेका अशोक राई अन्ततः एमालेकै सहयोगमा संसद प्रवेश गरेका छन् ।

एमालेको समर्थनमा सुनसरी १ बाट जनता समाजवादी पार्टीका राष्ट्रिय अध्यक्ष राई निर्वाचित भएका छन् । राष्ट्रिय स्वतन्त्र पार्टीकी गोमा तामाङलाई पराजित गर्दै राई प्रतिनिधि सभा सदस्यमा निर्वाचित भएका हुन् । राईले १७ हजार ५९ मत ल्याए भने तामाङले १६ हजार ६०६ मत पाइन् ।

माओवादीका मुक्सामहाङ्ग सुब्बाले १३ हजार ८७ मत ल्याएर तेस्रो भए । यस्तै, राप्रपाका अशोककुमार राईले सात हजार ८८४, एमालेबाट विद्रोह गरेर स्वतन्त्र उम्मेदवारी दिएका मनोजकुमार मेयाङ्गबोले सात हजार ८१२, अर्का स्वतन्त्र तर्कबहादुर मगरले तीन हजार ८१८, कुमार कार्कीले एक हजार ८६४, मातृकाप्रसाद भट्टराईले एक हजार ७६० मत पाएका छन् ।