काठमाडौँ, ७ भदौ । अफगानिस्तानबाट मानिसहरुको उद्धारका लागि व्यवसायीक जहाजहरु पनि प्रयोग गरिने अमेरिकाले जनाएको छ ।उद्धार अभियानलाई थप तीव्र पार्नका लागि व्यवसायीक जहाजहरु पनि प्रयोग गर्ने तयारी भएको अमेरिकाले जनाएको छ ।

अफगानिस्तानमा अगस्ट १५ मा तालिबान कब्जा गरेपछि हजारौँ अफगानीहरु देश छोड्न चाहन्छ । उनीहरु काबुल विमानस्थलको बाहिर भिडभाडसहित बसेका छन् । अमेरिकी राष्ट्रपति जो बाइडेनले आइतबार दिएको जानकारी अनुसार एक हप्ताकोबिचमा अमेरिकाले अफगानिस्तानबाट २८ हजार मानिसको उद्धार गरेको छ । ह्वाइट हाउसमा भएको पत्रकार सम्मेलनमा राष्ट्रपति बाइडेनले भने, ‘पीडा तथा तपाईँहरुले देखिनु रहनु भएका हृदयविदारक दृश्य बिना त्यहाँबाट यति धेरै मानिसहरुको उद्धारको सम्भावना छैन । हामीले अझै लामो यात्रा गर्नु छ र त्यस क्रममा गल्तीहरु हुन सक्छन् ।’

अहिलेसम्म भागदौड तथा गोली लागेर कम्तीमा २० जनाको ज्यान गएको छ । केही मानिसको कुचिएर मृत्यु भएको नेटोका अधिकारीले समाचार संस्था रोयटर्सलाई बताएका छन् । हजारौं मानिसले देश छोडेर भाग्ने प्रयास गर्दा विमानस्थल वरपर ठूलो भीड लाग्ने गरेको र अव्यवस्थाबीच सात अफगान नागरिकले ज्यान गुमाएका छन् । संयुक्त राज्य अमेरिका र यसका सहयोगी राष्ट्रहरूले तालिबानले सत्ता कब्जामा लिएदेखि हप्तामा उद्धार उडानमा जान प्रयास गरिरहेका मानिसहरूको ठूलो संख्याको सामना गर्न संघर्ष गरिरहेका छन् । काबुल विमानस्थल र वरपरको अवस्था अत्यन्तैै चुनौतीपूर्ण रहेको छ तर यथासम्भव मानिसहरूको सुरक्षित व्यवस्थापन गर्न हामीले सक्दो प्रयास गरिरहेको अमेरिकाले जनाएको छ ।

यता आइतबार अमेरिकाको रक्षा मन्त्रालयले सिभिल रिजर्भ एअर फिलिट (सिआरएएफ) सक्रिय पार्ने घोषणा गरेको हो । अफगानिस्तानबाट भइरहेको उद्धारलाई थप सक्रिय बनाउनका लागि यसो गरिएको रक्षा मन्त्रालयले जनाएको छ ।यसले आपतकालमा व्यवसायिक विमानहरुलाई परिचालन गर्न स्वीकृति प्रदान गर्छ । अमेरिकाले यो नियमको प्रयोग सन् २००३ मा इराकमा सैन्य अभियान सुरु गर्नु पूर्व र अभियानको क्रममा तथा सन् १९९०–९१ को खाडी युद्धको क्रममा गरेको थियो ।रक्षा मन्त्रालयको वक्तव्य अनुसार अहिले १८ विमानका लागि स्वीकृति प्रदान गरिएको छ । युनाइटेड एअरलायन्सका चार, अमेरिकन एअरलायन्स, एटलस एअर, डेल्टा एअरलायन्स र ओम्नी एअरका तीन–तीन तथा हवाइयन एअरलायन्सका दुई विमानले अफगानिस्तानबाट भइरहेको उद्धार अभियानमा भाग लिने भएका छन् ।