काठमाडौं, १९ असार । स्वीट्जरल्यान्डलाई पेनाल्टी सुट आउटमा पराजित गर्दै तीन पटकको च्याम्पियन स्पेन युरो २०२० को सेमिफाइनलमा पुगेको छ ।

सुरुआतदेखि नै स्वीट्जरल्यान्डको रक्षापंक्तिमाथि निरन्तर आक्रमण गरेको स्पेनले आठौं मिनेटमा डेनिस जकारियाले गरेको आत्मघाती गोलसँगै अग्रता लिएको थियो । स्पेनले पाएको कर्नरमार्फत् आएको क्रसमा डिफेन्डर जोर्डी अल्बाले पेनाल्टी एरिया बाहिरबाट गरेको प्रहार जकारियाको खुट्टामा लागेर गोलमा परिणत भएको थियो ।

पहिलो हाफमा १-० ले पछि परेको स्वीट्जरल्यान्डले दोस्रो हाफको सुरुआतदेखि नै आक्रामक शैली अपनाएको थियो ।बल पोसेसनमा हाबी बनेको स्पेनमाथि काउन्टर अट्याकको फाइदा उठाउँदै स्वीट्जरल्यान्डले ६८औं मिनेटमा आजका कप्तान शेर्डेन शकिरीको गोलसँगै बराबरी गरेको थियो ।

दुई स्पेनिस डिफेन्डर अलमलमा परेको फाइदा उठाउँदै रेमो फ्रेउलरले कप्तान शकिरीलाई सुन्दर पास दिएका थिए । शकिरीले सोही पासको सदुपयोग गर्दै स्पेनिस गोलकिपर उनइ सिमोनलाई बिट् गर्दै स्वीट्जरल्यान्डलाई बराबरीमा ल्याएका थिए ।

त्यसको ९ मिनेट नबित्दै स्पेनिस फरवार्ड जेरार्ड मोरेनोमाथि खराब फाउल गरेका फ्रेउलरले रातो कार्डको सामना गर्दै मैदानबाट बाहिरिनु परेको थियो । फ्रेउलरले रातो कार्ड पाएसँगै १० जना खेलाडीमा सीमित भएको स्वीट्जरल्यान्डले ९० मिनेटसम्म स्पेनलाई रोकेर अतिरिक्त समयमा लगेको थियो ।

अतिरिक्त समयमा पनि थप गोल हुन नसकेपछि खेल पेनाल्टी सुट आउटमा पुगेको थियो ।समूह एको तेस्रो स्थानमा रहेर अन्तिम १६ मा पुगेको स्वीट्जरल्यान्डले क्‍वार्टरफाइनल प्रवेशका लागि फ्रान्सलाई पराजित गरेको थियो । निर्धारित ९० मिनेटको खेल ३(३ गोलको बराबरीमा टुङ्गिएसँगै खेल अतिरिक्त समय हुँदै पेनाल्टी सुट आउटमा पुगेको थियो ।

पेनाल्टीमा सुरुआती पाँच प्रहारलाई गोलमा परिणत गरेको स्वीट्जरल्यान्डले फ्रेन्च फरवार्ड एम्बाप्पे असफल हुँदा जित निकाल्न सफल भएको थियो ।त्यस्तै, समूह ईको उपविजेताको रूपमा अन्तिम १६ मा पुगेको थियो । प्रि-क्‍वार्टरफाइनलमा क्रोएसियामाथि अतिरिक्त समयमा ५-३ को जित निकाल्दै अन्तिम ८ मा स्थान बनाएको हो । आजको जितसँगै सेमिफाइनलमा पुगेको स्पेनले आज राति नै हुने इटाली र बेल्जियमको विजेतासँग बुधबार खेल्ने छ ।