काठमाडौं, २१ माघ । राष्ट्रिय महिला लिग फुटबलमा विभागीय टिम त्रिभुवन आर्मी क्लबले फराकिलो जित निकालेको छ ।

सातदोबाटोस्थित एन्फा कम्प्लेक्समा आज भएको खेलमा आर्मीले उदयपुरको चौदण्डीगढी नगरपालिकालाई १२–० गोलको फराकिलो अन्तरले पराजित गरेको हो । आर्मीको जितमा शर्मिला थापाले ह्याट्रिकसहित ५ गोल गरिन् । सपना लामाले २ गोल गरिन् । यस्तै कप्तान अन्जली वाइबा, हेमा चौधरी, विमला चौधरी, विमला बिक र रश्मी घिसिङले १–१ गोल गरे ।

प्रतियोगिताकै सबैभन्दा कमजोर टिम चौदण्डीगढीविरुद्ध आर्मीले तेस्रो मिनेटमै अग्रता बनाएको थियो । जितसंगै आर्मीले ६ खेलमा १३ अंक जोडेको छ । आर्मी लिगको दोस्रो स्थानमा रहेको छ । चौदण्डीगढीको यो लगातार छैटौं हार हो ।