काठमाडौं, १६ साउन । नेपालमा कोरोना भाइरसबाट एकैदिन ४ जनाको मृत्यु भएको छ ।
स्वास्थ्य तथा जनसंख्या मन्त्रालयका अनुसार वीरगञ्ज महानगरका तीन जनाको गण्डक अस्थायी कोरोना अस्पताल र एकजनाको पाटन अस्पताल ललितपुरमा उपचारका क्रममा मृत्यु भएको हो । योसँगै नेपालमा कोरोनाबाट मृत्यु हुनेको संख्या ५६ पुगेको छ । सरकारले आज पीसीआर विधिबाट १० हजार ७ सय ६८ नमुना परीक्षण गरेको छ ।

जसमा २ सय २४ जनामा कोरोना पोजेटिभ देखिएको छ । उपत्यका छिर्ने विभिन्न नाकाहरुमा समेत परीक्षण गरिएको छ । साँगा फर्पिङ र थानकोट गरी १० हजार २ सय ५ जनाको संकलन गरी परीक्षण गरिएको छ । अहिलेसम्म ३ हजार ७ सय १३ जना रिपोर्ट आएकोमा २५ जनामा पोजेटिभ देखिएको प्रवक्ता डा. गौतमले बताए । अहिले देशभरीका आइसोलेसनमा ५ हजार ३ सय १६ जना रहेका छन् । शुक्रबार १ सय ५१ जना संक्रमित निको भएर घर फर्किएका छन ।