काठमाडौं, १ साउन । कोरोना महामारीका कारण बन्द रहेको साझा याताया आजदेखि पुनः सञ्चालनमा आएको छ । सरकारले लकडाउन लगाएपछि सार्वजनिक यातायातहरु बन्द भएका थिए तर, सरकारले सार्वजनिक सवारीलाई पुनः सञ्चालन गर्न अनुमति दिएसँगै सरकारी स्वामित्वमा रहेको साझा यातायातले पनि आजबाट आफ्नो सेवा शूरु गरेको छ ।

साझा यातायातले उपत्यकाका धेरैजसो रुटमा २६ वटा बस सञ्चालन गर्न लागिएको जनाएको छ। पहिलो दिन सरकारले तोकेअनुसार नै सिटभन्दा आधा यात्रु राखेर बस सञ्चालन गर्न लागिएको साझाका व्यवस्थापक महेन्द्र पाण्डेले जानकारी दिए ।

उनका अनुसार बसका कर्मचारी र यात्रु दुवैले आवश्यक सुरक्षाप्रति सर्तक हुने गरी बस सञ्चालन गर्न लागिएको छ । यात्रुले साझाका बसमा चढ्दा माक्स लगाउने, सेनिटाईजरको प्रयोग गर्ने र सामाजिक दूरी कायम गर्नेसँगै खुद्रा पैसा बोकर मात्रै बसमा यात्रा गर्नुपर्ने हुन्छ ।

साझा बसका कर्मचारीलाई पनि मास्क, पञ्जा, सेनिटाईजरलगायतको प्रयोग गर्ने व्यवस्था मिलाईएको साझाले जानाएको छ । शुरुमा कम संख्यामा बस चलाए पनि यात्रुको चाप अनुसार थप्दै लैजाने पाण्डेले जानकारी दिए ।