काठमाडौं, २६ मंसिर । निर्वाचन आयोगले समानुपातिक निर्वाचन प्रणालीतर्फ भाग लिन निवेदन दिएका राजनीतिक दलको अन्तिम नामावली शुक्रबार प्रकाशन गर्ने भएको छ।
आयोगले शुक्रबार नै राजनीतिक दललाई चुनाव चिह्न समेत प्रदान गर्ने जनाएको हो। समानुपातिक निर्वाचन प्रणालीतर्फको निर्वाचन अधिकृतको कार्यालयका अनुसार बिहीबार दलहरूबाट नाम फिर्ता लिन चाहेमा फिर्ताका लागि निवेदन दिने अवधि रहेकोमा कुनै दलबाट नाम फिर्ता लिने निवेदन नआएको आयोगले बताएको छ।समानुपातिक निर्वाचन प्रणालीतर्फ कूल ९३ वटा राजनीतिक दलबाट दर्ताका लागि निवेदन परेको छ। परेको निवेदन उपर आयोगले छानबिन गरी चुनावमा भाग लिने दलको अन्तिम नामावली प्रकाशन गर्ने भएको हो।नामावली प्रकाशन भएपछि आयोगले समानुपातिकतर्फ उम्मेदवारको बन्दसूची पेश गर्न २ साताको समय दिनेछ।सोही बमोजिम दलहरूले उम्मेदवारको बन्दसूची आगामी पुस १३ गते पेश गर्नुपर्ने भएको छ। आयोगले प्रकाशन गरेको निर्वाचन कार्यक्रम बमोजिम प्रत्यक्ष निर्वाचन प्रणालीतर्फको निर्वाचन कार्यक्रम आगामी माघ ६ गते शुरु हुने भएको हो।