काठमाडौं २३ मंसिर । नेकपा एमालेको ११औँ महाधिवेशनमा महिला नेतृहरूको सक्रियता बढ्ने क्रममा ईश्वर पोखरेल पक्षमा आधा दर्जन बढी महिला नेतृहरुले खुलेर समर्थन गरेका छन् । ११औँ राष्ट्रिय महाधिवेशन (२७–२९ मंसिर २०८२) नजिकिँदै गर्दा पार्टीभित्र नेतृत्व परिवर्तनको बहस चर्किएको छ। यस सन्दर्भमा महिला नेतृहरू वरिष्ठ उपाध्यक्ष ईश्वर पोखरेलको पक्षमा खुलेर उत्रिएका छन्। मंगलबार काठमाडौँको हार्दिक होटलमा आयोजित अन्तरक्रिया कार्यक्रममा उपाध्यक्ष अष्टलक्ष्मी शाक्यसहितका नेतृहरूले पोखरेलको नेतृत्वमा पार्टीको पुनर्गठन र लोकतान्त्रीकरणको पक्ष लिँदै अध्यक्ष केपी शर्मा ओलीले नेतृत्वबाट विश्राम लिनुपर्ने सुझाव दिएका छन्।

अष्टलक्ष्मी शाक्य (उपाध्यक्ष):उनले ओलीले महिलाहरूलाई सधैँ अपमान गरेकोमा चित्त दुखाइन् । विशेषगरी पूर्वराष्ट्रपति तथा मदन भण्डारीकी पत्नी विद्या देवी भण्डारीलाई ‘धामीझाँक्री’ भन्दै अपमान गरेको भन्दै ओलीलाई अध्यक्ष बनाउनु नहुने तर्क गरिन् । उनले ११औँ महाधिवेशनबाट नै ओलीको नेतृत्व समाप्त हुनुपर्ने धारणा राख्दै ओली महिलाहरुलाई अपमान गर्ने मुख्य पात्र भएको आरोप समेत लगाएकी छन् ।
डा. विन्दा पाण्डे (स्थायी कमिटी सदस्य): पोखरेलको समूहलाई समर्थन गर्दै पार्टीमा वैचारिक र लोकतान्त्रिक परिवर्तन आवश्यक रहेको हुनाले ओलीले अध्यक्षबाट विश्राम लिएर अभिभावक बन्न सुझाव दिइन् ।
केन्द्रीय सदस्यहरूः उषाकिरण तिम्सिना, शर्मिला कार्की, रचना खड्का र सरिता न्यौपाने लगायतका नेतृहरूले महाधिवेशनमार्फत नेतृत्व परिवर्तन गरी पार्टीको आन्तरिक लोकतन्त्रलाई मजबुत बनाउन पोखरेलको पक्ष लिएको घोषणा गरेका छन्।

यी नेतृहरूले ओलीको केन्द्रीकृत शैलीले पार्टीको एकतामा क्षति पुर्‍याएको भन्दै पोखरेलको सामूहिक नेतृत्व र पुनर्गठनको अवधारणालाई स्वागत गरे।

पोखरेलले ११औँ महाधिवेशनमा अध्यक्ष पदका लागि औपचारिक उम्मेदवारी घोषणा गरेका छन्। उनले पार्टी पुनर्गठन र रुपान्तरणको उद्देश्यसहित सामूहिक नेतृत्वको प्रतिबद्धता व्यक्त गरेका छन्। महासचिव पदका लागि भने उनको पक्षबाट सुरेन्द्र पाण्डे वा गोकर्ण विष्टबीच प्रतिस्पर्धा हुने सम्भावना छ।

पार्टीभित्रको गुटबन्दीः महाधिवेशनअघि प्रतिनिधि छनोट प्रक्रियामा ओली पक्ष र पोखरेल पक्षबीच तनाव देखिएको छ। लुम्बिनी प्रदेशमा ओली पक्षको हाबी छ भने अन्य क्षेत्रहरूमा विवाद जारी छ। राष्ट्रिय युवा संघले महाधिवेशनमा ५० हजार युवा उतार्ने घोषणा गरेको छ । यो संगठनले ओली पक्षलाई बलियो बनाउन भुमिका खेल्दै आएको छ ।
एमालेको महाधिवेशनमा महिला प्रतिनिधित्व अनिवार्य छ (लुम्बिनीबाट मात्र ५३ महिला प्रतिनिधि चयन हुँदैछन्) ।