काठमाडौं २० कात्तिक,। नेकपा एमालेका अध्यक्ष केपी शर्मा ओलीले लामो समयदेखि घृणा फैलाएर मान्छेलाई राक्षसमा परिणत गरेपछि २४ भदौमा आगजनीको विध्वंश भएको दाबी गरेका छन् ।

भक्तपुरको गुन्डुस्थित निवासमा आफ्नो पार्टीका नेता–कार्यकर्तासँगको भेटमा ओलीले देश अहिले असहज अवस्थामा पुग्नुमा समाजमा फैलाइएको घृणा सबैभन्दा महत्त्वपूर्ण कारण रहेको बताए।

‘सम्मानजनक ढंगले बोल्ने, अरुलाई आदर गर्ने हाम्रो परम्परा छ । त्यसलाई बिथोलेर अपशव्द बोलेर लेखेर घृणा फैलाउनेहरूले धेरै अघिदेखि नै समाजलाई भताभुंग पार्न खोजे । ध्वस्त पार्न खोजे,’ उनले भने, ‘२४ भदौको आगजनी घृणाको पराकाष्टा थियो । घृणा फैलाउँदै लगेर मान्छेलाई राक्षसमा परिणत गरेर आगो लगाइएको हो ।’

उनले सामान्य अवस्थाको मान्छेले त्यसरी आगो लगाउन नसक्ने भन्दै उनले थपे, ‘मान्छेले त आगो लगाउनै सक्दैन । मान्छेलाई राक्षसमा परिणत गरेपछि मात्र आगो लगाउन सकिन्छ । अहिले त्यही भएको हो ।’

पूर्वप्रधानमन्त्री ओलीले घृणा फैलाउने काममा काठमाडौं महानगरपालिकाका मेयर बालेन शाहको पनि भूमिका रहेकोतर्फ इंगित गरे ।

बालेनको नाम नलिई उनले भने, ‘स्टाटस लेख्दा नेपालीले बोल्ने भाषा लेख्छ रु त्यो असभ्यता हाम्रो संस्कृतिभित्र पर्दैन । त्यो असामाजिकता हाम्रो संस्कृतिभित्र पर्दैन । हाम्रो परम्परा सभ्य, आदर हो । असहमति राख्दा पनि सम्मानजनक ढंगले राख्ने हाम्रो परम्परा हो,’ उनले भने, ‘अहिले त अपशब्द बोलेर सुरु गर्नेहरू छन् ।’

मेयर बालेनले केही दिनअघि मध्यरात आपत्तिजनक शब्द प्रयोग गर्दै सामाजिक सञ्जालमा स्टाटस लेखेका थिए । आलोचनापछि उनले आधा घण्टामै स्टाटस हटाएका थिए ।

अदालतमा आगो लगाउनेहरुबाट बनेको सरकारले निरन्तर रुपमा असंवैधानिक कार्य गरिरहेको ओलीको आरोप छ ।

बिहीबार भक्तपुरमा आयोजित एक कार्यक्रममा ओलीले वर्तमान सरकार असंवैधानिक भएको बताउँदै देशलाई छाडा ढंगले चलाउनका लागि संसद भंग गरिएको आरोप लगाए ।

उनले विघटित प्रतिनिधिसभाको पुन:स्थापनाको  माग गरे । उनले देशव्यापी आन्दोलन गर्न लागेको बताए ।  ओलीले पहिले नै फैसला सुनाइसकेको मान्छेलाई जेन-जी आन्दोलन जाँचबुझ आयोगको अध्यक्ष बनाएर सरकारले ‘ड्रामा’ गरेको भन्दै आयोगको निर्णय मान्य नहुने बताए ।

निर्वाचनको म्याण्डेड पाएको सरकारले गरेको राजदूत फिर्ता गर्ने काम उचित नभएको उल्लेख गर्दै ओलीले राजदूत फिर्ताका विषयमा अदालतले गरेको आदेशसमेत प्रधानमन्त्रीले उलंघन गरेको बताए ।  ओलीले कम्युनिष्ट पार्टीबीच भएको एकताको कुनै अर्थ नरहेको समेत बताए ।  झलनाथ खनाल आफूसंग कुरा गर्न आएको भन्दै उनले पदमा कुरा नमिलेपछि माओवादीसँग मिल्न गएको बताए ।