धनगढी, २५ कात्तिक । सुदूरपश्चिम प्रदेश सरकारले डोटीका भूकम्प पीडितका लागि राहत दिने निर्णय गरेको छ ।

भूकम्पका कारण ज्यान गुमाएका व्यक्तिका परिवारलाई जनही एक लाख २० हजार, घर पूर्ण क्षति भएका परिवारलाई ५० हजार र घर पुनर्निर्माणका लागि जनही २५ हजार रूपैयाँ दिने निर्णय गरिएको जनाइएको छ ।

गएको मंगलबार राति र बुधबार बिहान डोटी केन्द्रबिन्दु भएर गएको भूकम्पका कारण सुदूरपश्चिममा जनधनको क्षति भएको छ ।

प्रदेश सरकारबाट पीडित परिवारलाई तत्काल केही राहत दिने निर्णय भएको मुख्यमन्त्री त्रिलोचन भट्टले बताए ।

बुधबार गएको ६.६ म्याग्निच्युडको भूकम्पका कारण घर भत्कँदा डोटीको पूवीचौकी गाउँपालिका–३ गैरागाउँमा ६ जनाको मृत्यु भएको थियो भने ५ जना घाइते भएका छन् ।