काठमाडौँ । सत्ता गठबन्धनबीच ८८ सिट बाँडफाँटमा कुरो मिलेको छ । संसदीय निर्वाचनका लागि सिट बाँडफाँट गर्न गठित कार्यदलले बुधबार साँझसम्म ८८ सिटमा समmदारी गरेका छन् ।
गत साउन २२ गते गठन भएको कार्यदलले सिट बाँडफाँटका लागि प्रतिशतका आधारमा तय गर्ने भनिएपनि त्यसमा सहमति हुन सकेन । त्यसैले पनि एक–एक सिटमा सहमति गर्दै ८८ सिटमा समझदारी गरिसकेको नेताहरुको दावी छ ।
प्रतिनिधिसभाका कुल १६५ निर्वाचन क्षेत्रमध्ये कांग्रेसले १ सय, माओवादीले ६०, जसपाले ३२ र समाजवादीले २० सिटमा दाबी गरेका छन् । तर, कांग्रेसले दाबी गरेकामध्ये ६० सिटमा अरू कसैको दाबी नपरेकाले ती सिटमा कांग्रेसले उम्मेदवारी पाउने पक्का भएको छ । त्यस्तै माओवादीले दाबी गरेका मध्ये १२ सिटमा गठबन्धनका अन्य दलको दाबी छैन ।
एकीकृत समाजवादीका पनि अध्यक्ष माधवकुमार नेपालले चुनाव लड्ने रौतहट–१, झलनाथ खनालको इलाम–१ र सचिव रामकुमारी झाँक्रीको गुल्मी–२ सहित ८ सिटमा अरूको दाबी छैन । जनता समाजवादी पार्टीका पनि ८ निर्वाचन क्षेत्रमा एकल दाबी छ ।
माओवादी अध्यक्ष पुष्पकमल दाहालले कांग्रेसले ५० प्रतिशत अर्थात् ८२ सिट र गठबन्धनका अन्य दलले ८३ सिट पाउनुपर्ने अडान राखिरहेका छन् । कार्यदलका संयोजक सिटौलाले यसअघि नै कांग्रेसले ८८ सिटको दाबी अघि सारेका थिए । त्यसैलाई आधार मानेर सभापति एवं प्रधानमन्त्री शेरबहादुर देउवाले समेत ८६ जोड २ को प्रस्ताव गरेका थिए । कांग्रेसले ८६ लिने र दुई सिट लोसपा अध्यक्ष महन्थ ठाकुर र नेता राजेन्द्र महतोका लागि छुट्याउने उनको प्रस्ताव थियो ।
COMMENTS