काठमाडौँ, १६ भदौ । हङकङलाई हराउँदै भारत एसिया कपको सुपर फोरमा प्रवेश गरेको छ । बुधबार राति सम्पन्न खेलमा हङकङलाई ४० रनले पराजित गर्दै भारत अघिल्लो चरण प्रवेश गरेको हो ।
भारतले दिएको १९३ रनको विशाल लक्ष्य पछ्याएको हङकङले ५ विकेटको क्षतिमा १५२ रन मात्र बनाउन सक्यो ।
हङकङका बाबर हायतले सर्वाधिक ४१ रनको पारी खेले । यस्तै, किन्चित शाहले ३०, जिशान अली र स्कट म्याकेचनीले अविजित २६ र १६ रन जोडे ।
भारतका भुवनेश्वर कुमार, अर्शदीप सिंह, रविन्द्र जडेजा र अवेश खानले समान एक–एक विकेट लिए ।
यसअघि, दुबइ अन्तर्राष्ट्रिय क्रिकेट स्टेडियममा टस हारेर पहिले ब्याटिङको निम्तो पाएको भारतले निर्धारित २० ओभरमा २ विकेटको क्षतिमा १९२ रन बनायो ।
मध्यम सुरूवात गरेको भारतका ओपनरद्व लोकेश राहुल ३६ र रोहित शर्मा २१ रनमा आउट भए । यस्तै, विराट कोहली ५९ र सूर्यकुमार यादव ६८ रनमा नटआउट रहे ।
कोहलीले ४४ बलमा ३ छक्का र ४ चौका हिर्काए भने यादवले २६ बलमा ६ छक्का र ६ चौकासहित ६८ रनको योगदान दिए ।
COMMENTS