सुदूरपश्चिम प्रदेशको राजधानी सरकारले नै तुहाएको आरोप

धनगढी । सुदूरपश्चिम प्रदेशको स्थायी राजधानी कैलालीको गोदावरीमा तोकिए पनि प्रदेश सरकारकै लापरबाहीका कारण हालसम्म कार्यान्वयन नभएको प्रदेश सदस्यले आरोप लगाएका छन् ।

नीति तथा कार्यक्रम र बजेटको पूर्व सन्ध्यामा सदनमा पेस गरिएको सिद्धान्त र प्राथमिकतामाथिको छलफलमा सहभागी अधिकांश प्रदेशसभा सदस्यहरुले गोदावरी राजधानी बनाउने योजना प्रदेश सरकारले नै तुहाएको आरोप लगाएका हुन् ।

‘दुई तिहाइ प्रदेशसभा सदस्यको निर्णयबाट गोदावरीमा राजधानी निर्माण गर्ने प्रस्ताव पारित भएको हो,’ प्रदेशसभा सदस्य भरत खड्काले भने, ‘तर सरकारका मन्त्रीको लापर्वाहीका कारण ४ बर्ष सम्म सो निर्णय कार्यान्वयन हुन सकेन, यो सरकारको कमजोरी हो, आफैले गरेको निर्णय प्रदेश सरकार आफैँले तुहाएको छ ।’

खड्का सत्तारुढ दल नेपाली कांग्रेसका तर्फबाट प्रदेशसभा सदस्य हुन् ।

प्रदेशसभा सदस्य बलदेव रेग्मीले राजधानी गोदावरीमा राख्ने निर्णय कार्यान्वयन गर्न कसले रोक्यो ? भन्दै प्रश्न गरेका छन् । दुई तिहाई मतले पारित भएको योजनामा हालसम्म बजेटसमेत नपारिएको भन्दै उनले सरकाको लापरबाहीका कारण राजधानी बन्न नसकेको आरोप लगाए ।

यसैगरी प्रदेश सभा सदस्य मेहेशदत्त जोशीले राजधानीमा बजेट नछुट्याइनुको कारण माग गरेका छन् । ‘आफैँ राजधानी बनाउँछौ भन्दै संसदमा प्रस्ताव पेश गरेर पारित गर्ने सरकारले किन संरचना निर्माणका लागि बजेट छुट्याउँदैन,’ उनले भने, ‘डिपिआर सम्म पनि बन्न नसक्नुको कारण के हो ?’

प्रदेश सरकारका मन्त्री उपभोक्ता समितिका अध्यक्ष जस्ता भएको उनको आरोप छ । ‘योजना पार्न र त्यसबाट कमिसन खान मात्रै सक्रिय बनेका मन्त्री मन्त्री नभएर उपभोक्ता समितिका अध्यक्ष जस्ता बनेका छन्, ‘जोशीले भने, ‘उनिहरुका कारण प्रदेश सरकार असफल भएको छ, जनताले गाली गर्ने अवस्था तिनिहरुकै कारण भएको छ ।’

प्रदेशसभा सदस्य गेल्बुसिंह बोहराले सरकारलाई राजधानीका बारेमा के गर्ने ? भन्दै प्रश्न गरे । ‘४ बर्ष सम्म राजधानीका बारेमा के गरियो ?,’ बोहराले प्रश्न गर्दै भने, ‘कति बजेट छुट्टाइयो, आगामी योजना केहो ?’ उनले सुदूरपश्चिमका पहाडी जिल्लाका लागि धनगढी काठमाडौँभन्दा टाढा हुनथालेको गुनासो गरे । ‘प्रदेश सरकार बनेपछि काठमाडौँको हेपाह प्रवृति अन्त्य हुने जनताले ठुलो खपेक्षा गरेका थिए,’ बोहराले भने, ‘तर दार्चुला, बझाङ, बाजुराका नागरिकका लागि धनगढी काठमाडौँभन्दा पनि टाढा भएको छ, त्यहाँका नागरिकको प्रदेश सम्म पहुच नै भएको छैन ।’ सरकारले पहाडी जिल्लालाई विभेद गर्ने र बजेटमा समेत प्राथमिकता नराखेका कारण प्रदेश सरकार प्रति जनताको विश्वास कम हुदै गएको उनले बताए ।

  • Nepal News Agenacy Pvt. Ltd.

  • Putalisadak, Kathmandu Nepal

  • 01-4011122, 01-4011124

  • [email protected]

  • Department of Information and Broadcasting Regd.No. 2001।077–078

©2024 Nepal Page | Website by appharu.com

Our Team

Editorial Board