काठमाडौँ । दिल्ली क्यापिटल्सलाई मुम्बइ इन्डियन्सले पाँच विकेटले हराउँदा इन्डियन प्रिमियर लिग (आइपिएल) टी–२० क्रिकेट प्रतियोगितामा बेंगलोरले प्लेअफ स्थान बनाएको छ ।

शनिबार राति पराजित दिल्ली र विजयी मुम्बइ दुवै प्लेअफबाट टाढा रहे । तर, यो नतिजासँगै मैदान बाहिर रहेको बेंगलोर प्लेअफमा स्थान बनायो ।

योसँगै आइपिएको प्लेअफ समीकरण पूरा भएको छ । पहिलो क्वालिफायरमा गुजरात टाइटन्स र राजस्थान रोयल्स भिड्ने छन् । एलिमिनेटरमा लखनउ सुपर जाइन्ट्स र बेंगलोरले प्रतिस्पर्धा गर्नेछन् ।

यसअघि दिल्लीले दिएको १६० रनको लक्ष्य मुम्बइले १९ ओभर १ बलमा ५ विकेट गुमाएर पूरा गरेको थियो । मुम्बइका इशान किशनले ४८ रन जोडे । दिल्लीका सार्दुल ठाकुर र एन्रिच नोर्कियाले २–२ विकेट लिए ।

सुरुवाती ब्याटिङ गरेको दिल्लीले २० ओभरमा ७ विकेट गुमाएर १५९ रन जोड्यो ।

दिल्लीका रोभमान पावेलले ४३ रन जोडे । मुम्बइका जस्प्रित बुम्राहले ३ विकेट लिए ।