काबुल, ३० बैशाख । अफगानिस्तानको राजधानी काबुलमा शुक्रबार मस्जिदमा विस्फोट हुँदा कम्तीमा तीन जना उपासक घाइते भएको राजधानी प्रहरीले पुष्टि गरेको छ ।

काबुल प्रहरी प्रवक्ता खालिद जाद्रानले सामाजिक सञ्जालमा लेखेका छन्, ‘प्रहरी जिल्ला ५ को एक मस्जिदमा विष्फोट भएको थियो जहाँ उपासकहरू दिउँसो शुक्रबारको प्रार्थना गरिरहेका थिए।

‘प्रारम्भिक प्रतिवेदनमा तीन जना घाइते भएको पाइएको छ। सुरक्षाकर्मीहरू घटनास्थलमा पुगेका छन् र अनुसन्धान भइरहेको छ,’ उनले भने। ‘चार राही कम्बर इलाकामा रहेको अयुब-ए-साबिर मस्जिदमा मानिसहरू शुक्रबारको नमाज पढ्दै गर्दा हामीले विस्फोटको आवाज सुन्यौं। अहिले सम्पूर्ण ठाउँ सिल गरिएको छ,’ एक प्रत्यक्षदर्शीले सिन्ह्वालाई बताए। तालिबान सुरक्षा बलहरूले विस्फोटको लगत्तै त्यस क्षेत्रलाई घेरा हालेका थिए, र मानिसहरूलाई भेला हुनबाट रोकेका थिए।

आक्रमणको जिम्मेवारी कुनै समूहले लिएको छैन। पछिल्लो समय तालिबान नेतृत्वको सरकारको विरोध गर्ने इस्लामिक स्टेट आतङ्ककारी समूहका लडाकुहरूले आतङ्ककारी हमलाहरूको शृङ्खला बढाएका छन् ।