काठमाडौं, २७ वैशाख । १३औं दक्षिण एसियाली खेलकुदमा नेपालका लागि ऐतिहासिक स्वर्ण जितेकी भारत्तोलन खेलाडी सञ्जु चौधरीले ‘आत्महत्या’ गरेपछि समग्र खेलकुद जगत स्तव्ध छ ।

प्रशिक्षक सञ्जय महर्जनको घरमा बस्दै आएकी सञ्जुले सोमबार राति सोही घरको भुइँतलाको कोठामा सलको पासो लगाएर ‘आत्महत्या’ गरेकी हुन् । प्रहरीले मुचुल्का उठाएर शव पोष्टमार्टमका लागि पाटन अस्पताल पुर्‍याएको छ ।

६ महिनाअघि नेपाल प्रहरीको जागीर छाडेर बसेकी सञ्जु एसियाली खेलकुदका लागि राष्ट्रिय टोलीमा छानिएकी थिइन् । १३ औं सागमा स्वर्ण जित्ने पहिलो महिला भारत्तोलन खेलाडीको कीर्तिमान राखेकी उनको लक्ष्य एसियाली खेलकुदमा शीर्ष पाँचभित्र पर्ने थियो । अर्थात्, उनी आफ्नो करिअरमा सकारात्मक थिइन्, एसियाड सफलताको लक्ष्य निर्धारण गरेकी थिइन् ।

नेपाल पुलिस क्लबबाट सँगै खेलेकी टीका गुरुङले सञ्जुलाई बहादुर र आत्मविश्वासले भरिएको खेलाडीका रुपमा चिन्छिन् । टीकाका अनुसार पुलिसको जागिर छाडेपछिको समयमा सञ्जुको व्यवहार केहि भिन्न थियो, उनी केहि दुब्लाएकी थिइन् ।

‘जागीर छाडेपछि कमाइ पनि भएन भन्नेखालको चिन्ता सुनाएकी थिइन् । हामीले उनलाई धेरै सम्झाएका थियौं,’ टीकाले कुराकानीमा भनिन्, ‘अरु कुराहरु पनि केहि छ कि भनेर सोध्दा मेरो व्यक्तिगत कुरा हो भन्थिन् ।’

सञ्जुले नजिकका साथीभाइसँग आफूले आत्महत्या गर्ने पनि बताएको टीकाले पुष्टि गरिन् । ‘उसले भनेको त थियो तर मजाकमा होला भनेर खासै ध्यान दिएनौं । साँच्चिकै रहेछ भन्ने त्यतिबेला बुझ्न सकिएन । नत्र प्रशिक्षक र संघका सरहरुलाई पनि खवर गर्ने थियौं,’ टीकाले भनिन् ।

पुलिसको जागीर छाडेपछि भारत्तोलनका प्रशिक्षक र डाइट न्युट्रिसियनसमेत रहेका सञ्जय महर्जनले सञ्जुलाई आश्रय दिएका थिए । एशियाली खेलकुदमा छनोट भएपछि ललितपुरको लुभुस्थित महर्जनको घरमा बसेर उनले तयारी गरिरहेकी थिइन् ।

सातौं राष्ट्रिय खेलकुदमा खेलको नियम नबुझेर अयोग्य भए पनि महर्जनले नै उनको क्षमता पहिचान गरी प्रशिक्षणका लागि काठमाडौं ल्याएका थिए । आफूलाई च्याम्पियन बनाउन महर्जनको सबैभन्दा ठूलो सहयोग रहेको सञ्जुले बताएकी थिइन् ।

सोमबार साँझ महर्जनको घरमा भोज थियो । नेपाल भारोत्तोलन संघका अध्यक्ष राम श्रेष्ठ (बोस) पनि पुगेका थिए । भोजमा सञ्जुले पनि सक्रियताका साथ खानेकुरा बाँडिरहेको र सबैसँग हासीखुसी व्यवहार गरिरहेको आफूले पाएको अध्यक्ष श्रेष्ठले बताए ।

‘म राति नौ बजेमात्र त्यहाँबाट निस्किएको हुँ । त्यसबीचमा मैले सञ्जुको बोली, व्यवहार र अनुहारमा तनावको कुनै संकेत पाएको थिइनँ । एकैपल्ट बिहानै सञ्जय गुरुले फोन गरेर यस्तो खबर सुनाउनुभयो,’ श्रेष्ठले भने, ‘मैले कुनै त्यस्तो संकेत पाएको भए सञ्जुको यो अवस्था आउन दिँदैनथ्यौं ।’

ललितपुरको महालक्ष्मी नगरपालिकामा पर्ने लुभुुमा प्रशिक्षक महर्जनको घरको भुइँतल्लाको कोठामा सञ्जु झुण्डिएको अवस्थामा मृत भेटिएकी हुन् । बिहान चाँडै उठेर प्रशिक्षणमा जाने सञ्जु अबेरसम्म नउठेपछि थोरै पर्दा खुलेको झ्यालबाट हेर्दा महर्जनले झुण्डिरहेको देखेका थिए । त्यसपछि उनले भारोत्तोलन संघका अध्यक्ष र प्रहरीलाई खबर गरेका हुन् ।

सोमबार राति १० बजेर ३ मिनेटमा सञ्जुले आफ्नो फेसबुक एकाउन्टमा एउटा भिडियो सेयर गरेर क्याप्सनमा लेखेकी छन्, ‘मिसिङ यू लभ’ त्यसमा लभ इमोजी पनि राखिएको छ । यो भिडियो पाकिस्तानी वेव सिरिज ‘मेरे हमसफर’को हो । यहाँ सिरिजको दुई प्रमुख पात्रबीचको कुराकानीको क्रममा नायिकाले नायकसँग सोध्छिन्– ‘परिवारको दबावमा आएर तिमीले मलाई छोड्न त छोड्दैनौ नि ?’ त्यसपछि भिडियो निरन्तर भए पनि हिन्दी गीतको म्युजिक सुरु हुन्छ ।

यो सिरिजमा नायिकालाई उनको परिवारले मानसिक र शारीरिक तनाव दिएको हुन्छ । उनलाई साथ दिने एकमात्र व्यक्ति उनका श्रीमान हुन्छन् । यसै कथाको वरिपरि त्यो सिरिजको कथा घुमेको छ । २२ वर्षीया सञ्जुले ‘मिसिङ यू लभ’ भनेर यो सिरिजको क्लिप फेसबुकमा शेयर गर्नुलाई प्रेम र पारिवारिक तनावका बीच सञ्जुले मृत्युको बाटो रोजेको हो कि भन्ने प्रहरीको आशंका छ ।