संघिय राजधानी काठमाडौंको शहरमा लत्रिएका तार र अव्यवस्थित पोल । बत्ती, केबल, नेट र टेलिफोनका तार एउटै पोलमा जोडिएका छन् । तीव्र रूपले जनसंख्या बढेको छ । नयाँ प्रविधि प्रयोग गर्नेको संख्या पनि उकालो लाग्दै छ। एउटै खम्बामा हजारौं तार जोडिएका छन् । तारको संख्या थेग्न नसकेर खम्बा ढल्केका छन् । फलामका तार खिया लागेर भाँचिन मात्र बाँकी छ । तैपनि टेलिकम, विद्युत् प्राधिकरण, सडक विभाग र महानगरले खम्बा फेर्नमा कुनै चासो देखाएका छैनन् । एक अर्कोमा आरोप प्रत्यारोप लगाएर विद्युत प्रधिकरण र दुरसंचार प्रदायक संस्थाबीच जुहारी चलेको छ । विद्युत प्राधिकरण पनि विभिन्न स्थानमा तार काट्दै लथालिङ अवस्थामा छोडेको छ ।

तार लत्रँदा मान्छेलाई करेन्ट लाग्ने सम्भावना धेरै हुन्छ । खम्बाबाट झरेको तार कुनै पनि बेला चुँडिन सक्छ । ०७३ सालपछि शेरबहादुर देउवाको सरकारमा सूचना तथा सञ्चारमन्त्री मोहन बस्नेत थिए । उनले सबै तार अण्डरग्राउण्ड गर्ने भनेर मन्त्रीस्तरीय निर्णय गरे । निर्णयसँगै उनी आफैँले शहरको तार काट्ने कामको थालनी गरे । लगत्तै केपी ओलीको सरकार आयो । सूचना तथा सञ्चारमन्त्री बनेका गोकुल बाँस्कोटाले तार व्यवस्थित गर्नेतिर कुनै चासो दिएनन् । काम गर्न खोज्दाखोज्दै आफ्नै बोलीले उनी सिद्धिए । केपी ओलीकै पालामा पटक पटक सूचनामन्त्री फेरिए तर कसैबाट पनि सोचेअनुरूप काम हुन सकेन । उपत्यका मात्र होइन, ७ वटै प्रदेश अव्यवस्थित तारका कारण अस्तव्यस्त बनेको छ । अव नेपाली काँग्रेसका सभापति शेर बहादुर देउवाको नेतृत्वमा नया सरकार बनेको छ , विद्यु्त प्राधिकरणपनि नया कार्यकारी प्रमुखको आगमन भएको छ । अव यो तार व्यवस्थापनले निकास पाउनु पर्छ ।