काठमाडौं, २९ कात्तिक । फ्रान्समा कोरोना भाइरसका कारण गरिएको लकडाउन आउंदो डिसेम्बर महिनासम्म गरिने भएको छ ।

यो लकडाउनको अवधिमा तोकिएको समयमा भन्दा बाहेक मानिसहरु घरबाट बाहिर निस्कन पाउने छैनन भने कतिपय प्रतिबन्ध गरिएका सेवाहरु पनि सञ्चालन गर्न नपाइने फ्रान्सका प्रधानमन्त्री जिन क्यास्टेस्कले जनाएका छन् । केही समयअघि फ्रान्सको सरकारले सङ्क्रमितहरु पहिलेको तुलनामा निकै बढ्न थालेपछि लकडाउन गरेको हो ।

प्रधानमन्त्री क्यास्टेस्कले पछिल्लो चरणमा देखा परेको कोरोना भाइरसको प्रभाव निकै रहेको बताए । उनका अनुसार फ्रान्समा पछिल्लो हप्ताको तथ्याङ्क हेर्दा हरेक दिन कम्तीमा पनि ५०० जनाको निधन हुने गरेको छ भने दैनिक हजारौं जना सङ्क्रमितहरु थपिने गरेका छन् ।