बुटवल, २० असोज । प्रदेश नम्बर ५ को नाम प्रदेशसभाको मंगलबार बसेको बैठकले लुम्बिनी राख्ने निर्णय भएको छ । दुईतिहाइ बढी मतले प्रदेशको नाम लुम्बिनी राख्ने निर्णय गरेको हो।

सभामुख पूर्ण घर्तीले दिएको जानकारी अनुसार प्रदेशको नामाकरण गर्न भएको मतदानमा ८७ मध्ये ८३ जनाले भोट हाले । लुम्बिनी नाम राख्ने पक्षमा ७९ मत खसेको छ भने विपक्षमा जम्मा ४ मत खसेको छ ।

यस्तै प्रदेशसभाले आजै स्थायी राजधानी दाङको देउखुरी राख्ने निर्णय गरेको छ। दाङ राजधानी राख्ने विपक्षमा कांग्रेसका १३ जनाले मत दिएका थिए। राजधानी राख्ने पक्षमा नेकपाका ६१ र कांग्रेसका ५ सहित ६९ मत खसेको थियो ।