जनकपुरधाम, १ भदौ । नेपालमा थप एक जना कोरोना संक्रमितको मृत्यु भएको छ । धनुषामा आज ६५ बर्षीय पुरुषको कोरोना संक्रमणबाट मृत्यु भएको हो ।
प्रदेश २ को सामाजिक विकास मन्त्रालयका अनुसार जिल्लाको धनौजी गाउँपालिका वडा नम्बर ३ कटैया निवासी पुरुषको प्रादेशिक अस्पताल जनकपुरमा उपचारका क्रममा मृत्यु भएको हो ।
ती पुरुष बिरामी परेर गत साउन २६ गते अस्पताल भर्ना भएका मन्त्रालयका वरिष्ठ जनस्वास्थ्य प्रशासक विजय झाकाले मिडियालाइ जानकारी दिएका छन् । उनको सोही दिन स्वाब संकलन गरेर परीक्षणका लागि पठाइएको थियो ।
साउन ३१ गते रिपोर्ट आउँदा कोरोना संक्रमण पुष्टि भएको थियो । जटिल किसिमको निमोनियाबाट ग्रसित ती पुरुषलाई ३१ साउनकै राति सास फेर्न समस्या भएपछि आईसीयूमा भर्ना गरिएको थियो ।
धनुषामा योसँगै कोराना संक्रमति भएर मृत्यु हुनेको संख्या ९ पुगेको छ ।
COMMENTS