काठमाडौं, २६ साउन । पछिल्लो समय काठमाडौं उपत्यकामा कोरोना संक्रमण बढिरहेको छ । कोरोना भाईरस संक्रमित बढेपछि कोटेश्वरस्थित असर्फी टोलमा सिल गरिएको छ । काठमाडौं महानगरपालिका-३२ कोटेश्वरस्थित असर्फी टोलमा संक्रमित बढेपछि उक्त टोल सिल गरिएको हो ।

उक्त टोलमा थप १३ जनामा कोरोना पोजेटिभ देखिएका छन् । साउन १८ गते किराना पसल सञ्चालक चार जनामा कोरोना पुष्टि भएपछि आसपासका घरमा बस्नेको स्वाब संकलन गरी पिसिआर परीक्षण गर्दा थप १३ जनामा कोरोना देखिएको हो ।

वडा सदस्य हिरादेवी पोखरेलका अनुसार आइतबार १३ जनामा कोरोना पुष्टि भएकामध्ये १० जनालाई कीर्तिपुर र टेकुस्थित अस्पतालमा आइसोलेसनमा राखिएको छ। तीन जनालाई भने उनीहरूकै घरमा राखिएको हो।

कोरोना देखिएका अधिकांश मानिस कोठा भाडामा लिएर बस्नेहरू हुन्। उनीहरूमध्ये कतिपय मजदुरी गर्छन्।