काठमाडौं ३१ वैशाख । कोरोना भाइरस (कोभिड– १९) को कारण ढिलोग गरी आह्वान भएको संसदमा पेश भएको प्रि बजेट छलफलमा प्रशस्त मात्र मा छलफल गर्न नपाएको भन्दै सत्तारुढ नेकपाका सांसदहरुले नै आक्रोश व्यक्त गरेका छन् । चार दिन प्रिबजेट छलफल भएसंगै बुधबार सकिएको छ । अर्थमन्त्री युवराज खतिवडाले प्रिबजेटका क्रममा उठेका प्रश्नको जवाफ पनि दिएका छन् ।

सभामुख अग्निप्रसाद सापकोटाले प्रिबजेट छलफल सकिएको घोषणा गर्दै जवाफ दिन मन्त्री खतिवडालाई जवाफ दिन रोष्ट्रममा बोलाए लगत्तै सत्तारुढ नेकपाका सांसदहरूले भने बोल्न नपाएको भन्दै संसदमा आपत्ति प्रकट गरेका थिए ।
ढिलो संसद आह्वान भएकाले प्रिबजेटमाथि पर्याप्त छलफल हुन सम्भव भएन । संवैधानिक व्यवस्था अनुसार प्रिबजेट पहिले आउनुपर्ने सरकारको नीति तथा कार्यक्रम पछाडिका लागि सारिएको भन्दै सांसदहरुले आपत्ति जनाएका छन् । राष्ट्रपति विद्यादेवी भण्डारीले जेठ २ गते संसदमा नीति तथा कार्यक्रम पेश गर्ने कार्यक्रम तय भएको छ ।

संवैधानिक व्यवस्थाअनुसार बजेट जेठ १५ गते आउनै पर्छ । त्यसको १५ दिन पहिले प्रिबजेट छलफल सक्नुपर्ने प्रतिनिधिसभा नियमावलीमा व्यवस्था भएपनि क्रोना संक्रमणका कारण नियमावली अनुसार हुन नसकेको नेकपा नेता दीनानाथ शर्माले बताए ।

नेकपा संसद गंगा चौधरी सत्गौवाले आफूले प्रिबजेट छलफलमा बोल्न नपाएकोमा उभिएर जनाइन् । उनले आफू निश्चित जातिको भएको र समानुपातिक सांसद भएकाले बोल्न नदिएको आरोप समेत लगाइन् । ुसमानुपातिक सांसद हो, थारुको चेली हो बोल्न जान्दिन भनेर समय नदिइएको हो,ु आक्रोशित भएकी उनले भनिरहेकी थिइन् ।

बोल्न नपाएका सांसद नारायणप्रसाद मरासिनीले तीन दिन बसेर पनि प्रिबजेट छलफलमा समय नपाएकोमा आपत्ति जनाए । ुहामी पनि जनप्रतिनिधि हौं, हामीले पनि बोल्न पाउनुपर्छ,ु उनी कड्किरहेका थिए ।

मुस्तांगका सांसद प्रेम तुलाचनले आफूहरूले बोल्दा विवादित हुन्छ भनेर समय नदिइएको आरोप लगाए । सांसद नारायणप्रसाद खतिवडालगायतले पनि आपत्ति जनाएका थिए ।

सभामुख सापकोटाले भने दलीय आधारमा नाम आएको र समय सकिएकाले बोल्न दिन नसकिने रुलिंग गरेका थिए । सापकोटाले सांसदहरूले उठाएका कुराप्रति ध्यानाकर्षण भएको र अर्कोपटक बोल्न दिने जवाफ दिएका थिए । घडी देखाउँदै सभामुख सापकोटाले भने ु१५ दिन पहिला प्रिबजेट छलफल सक्नैपर्छ । दलीय आधारमा आएको नाम हो तपाईंहरू बसिदिनुस् ।ु सांसदहरूले त्यति गर्दा पनि नमानेपछि सभामुखले पार्टीको संसदीय दलको बैठकमा कुरा उठाउन सुझाव दिएका थिए ।

नेकपा भित्रको विवादका कारण पनि संसदमा सत्तारुढ दलकै सांसदहरुले आक्रोश पोखेको स्रोतको दावी छ ।